“He mea ārahi ēnei panonitanga e ngā mātāpono o Tātai Whetū; he tohu kē rā i tō tātou ngākaunui ki te auahatanga me ngā tūhononga. Mā ēnei whakataunga e noho mātāmua tonu ai te reo me ngā tikanga Māori i ā mātou kawenga mahi katoa ki Whakaata Māori nei, kia whai kiko ai, kia toiora tonu ai tātou i tēnei ao hurihuri,” te kōrero a te Kaihautū, a Shane Taurima.

“Ko te mihi tēnei a te ngākau ki ngā kaihoe katoa i whakapau i ō rātou kaha ki tēnei haerenga. Ki te hunga e wehe ana, me kore ake te nui o ngā mahi i oti i a koutou hei ahuahu i a Whakaata Māori, waihoki i tana kaupapa. Otirā, ki te hunga e noho mai ana, mā ō koutou manawa piharau tō tātou waka e pae ki uta, ki te ūnga hou.”

“E anga whakamua ana te titiro, ā, e ngākaunui tonu ana mātou ki ā mātou apataki me ngā hapori. Mā roto i te kaupapa o Tātai Whetū me ōna mātāpono, ka haere tonu ā mātou mahi ki te whakapāho i ngā kaupapa mīharo, ki te whakamana i te reo me ngā tikanga Māori i ngā ara e tino whai take ana ki te hunga e manawanui nei ki te kaupapa,” te kōrero a Shane Taurima.

Ngā Mātāpono e Ārahi ana i ngā Panonitanga:

• Āheinga Matihiko: Kia toro whānui, kia māmā ake te toronga mai mā ngā pae hou.

• Anga Whakahaere Hangore: Kia arotau ki te hihiritanga o te ao pāpāho.

• Toronga Apataki: Kia kaha ake te tūhono atu ki ngā apataki kanorau.

• Arotautanga Rawa: Kia whakapaua ngā kaha ki ngā kawenga whai kiko.

• Whanaketanga Mahi: Kia poipoia ngā kaihoe puta noa i te whakahaere.

• Kaupapa Whai Hua: Kia tukua ngā kōrero whakamīharo, whakahihiko hoki.

• Kōtuituinga: Kia whakakaha i ngā mahinga ngātahi hei tautoko i te reo me ngā tikanga Māori.

Ngā Whakatau Matua:

1. Te Whakahekenga o ngā Tūranga Mahi:

Kua whakarerekētia ngā tūranga mahi kia hāngai ki tā mātou rautaki kia ū tonu a Whakaata Māori ki tana aronga ā-ahurea, ā-mātauranga.  E 27 ngā tūranga mahi kua whakamoea.  

2. Te Whakawhitinga o te Hongere o Te Reo ki te Ao Tuihono:

Atu i a Māehe 2025, ka motuhake te whakawhitinga o te hongere o Te Reo ki te pae tuihono. E whakaū ana tēnei kaunekenga i te manawanui o Whakaata Māori ki te tūtakitaki ki ngā apataki i ngā wāhi e rata ana ki a rātou, kia whirinaki ai mātou ki te kaha o ō rātou hiahia ki ngā kaupapa tononoa, matihiko hoki, me te whai kia wātea tonu, kia whakanuia tonutia hoki te reo Māori i ngā pae hou. Ka pāhotia tonutia te hongere o Te Reo mā te taupānga Māori+, mā te pae tukutuku: www.maoriplus.co.nz rānei.

3. Te Kaha o te Aro ki ngā Pūrongo Matihiko:

Ka kaha te whakawhirinaki a Whakaata Māori ki ngā huarahi matihiko hei pāho i ā mātou pūrongo, ka aro pū ki te auaha me ngā pae kakama hei whakaratarata mai i ngā apataki pūhou. Ko tētahi wāhanga, hei te 13 o Tīhema 2024, ka whakamoea te pāhotanga mā te pouaka whakaata kia pai ai tā mātou tuku atu i te hirahira o ā mātou pūrongo hāngai pū ki ngā apataki kuneroa. Ka whakairia a Te Ao News ki te taupānga o Te Ao News me te pae tukutuku: www.teaonews.co.nz.

He Tirohanga Whakamua:

I ōna kokenga whakamua, ka pūmau a Whakaata Māori ki te tuku i ngā kaupapa whakamīharo e whakaata atu ana, e whakamana ana hoki i te ao Māori. Ko ngā hua miramira i puta i te pūrongo ā-tau 2023/24 ko ngā pānga pāhekoheko o ngā kōrero tuku iho :

• E 65% o ngā kaimātaki Māori e mea ana kua nui ake te kōrerotia o te reo Māori nā runga i ngā kaupapa a Whakaata Māori.

• E 60% o ngā kaimātaki Māori e whakatipu ana i ā rātou tamariki kei te rata mai ki ngā kaupapa tamariki a Whakaata Māori hei tautoko i ā rātou haerenga reo.

• E 66% o ngā rangatahi Māori (18-29 ngā) e māia ana i tō rātou Māoritanga nā runga i ngā kaupapa a Whakaata Māori.

• E 66% o ngā kaimātaki tauiwi e mea ana kua whānui ake ō rātou māramatanga ki te ahurea me ngā tirohanga Māori nā runga i ngā kaupapa a Whakaata Māori.

E whakaatu ana ēnei hua i te mana o ēnei mahi kia tipu ai te whanaungatanga, te māramatanga me te ngākau manawareka o ā mātou apataki ki tō rātou ahurea. Ko te mahi a Wai Whakaata he whakariterite mai i tēnei whakahaere kia whanake ake ngā tutukitanga, e taea ai ia te whakatō i te wairua hīkaka ki roto rā anō i te marea mā te auahatanga me te aro pū ki ngā pae matihiko.

Kāore a Whakaata Māori mō te whakaputa anō i ētahi taipitopito e pā ana ki ngā mahi mō Wai Whakaata.

He Kōrero mō Whakaata Māori:

He hinonga motuhake a Whakaata Māori e manawanui nei ki te whakatairanga i te reo me ngā tikanga Māori, i ngā kōrero tuku iho hoki mā roto i te auaha me te hirahira o ngā mahi whakaata. I te mea he wāhanga mātou nō te ahurea taketake o Aotearoa, ka haere tonu ā mātou mahi ki te whakamānawa me te tūhono i ngā apataki o te motu, ā puta noa i te ao.

‍