Ko te kōrero a Tā Herewini Parata, Toihau o Te Matatini, “Kei te hoki atu ki ngā ringa roha o Taranaki.  Ko Te Matatini o Te Kāhui Maunga 2025 te huinga kapa haka ā-motu nui ake i roto i ngā tau.  Nā te nui o ngā kapa haka i eke ki te taumata, kua āpitihia tētehi rangi anō ki te hōtaka.” 

“He ekenga hirahira te whai wāhitanga mai o Whakaata Māori me Te Reo Tātaki ki Te Matatini 2025 kia rongo te minenga i te mana, i te ātaahua o te taumata teitei o te kapa haka.  

Ka tū te hui nui ā te 25 o Pēpuere ki te 1 o Māehe.  Hui katoa, e 55 ngā kapa ka tū ki Ngāmotu.  Ka āhei tā te iwi mātakitaki i ngā nekeneke me ngā mahi katoa a ngā kapa haka ki TVNZ 2, ki TVNZ+, ki Whakaata Māori me Māori+. 

Ko tā te taiopenga he whakakotahi i ngā tikanga me ngā kōrero tuku iho a ngā hapū, ngā iwi, ngā waka hei whakaatu i te kanorau o ngā mahi toi Māori mā roto i te kapa haka. Ko te kapa haka te whakakotahitanga o te waiata, o te korikori, o te tukutahi, me te mahi waiata. 

Hei tā te Kaiurungi Pāpāho o Whakaata Māori, tā Maria Barlow, he kaupapa whakahirahira a Te Matatini 2025 e kitea ai te hiranga, te ahurea me te kotahitanga o te iwi Māori. 

“Ehara a Te Matatini i te huihuinga noa nei – koinei te kaupapa matua o te ao Māori e rangona ai te wairua me ngā tōmina nui o ngā mātua tīpuna ki te āpōpō. Mā roto i ngā mahi kapa haka kitea ai te whakahaumanutanga o te reo, o ngā tikanga me ngā kōrero tuku iho e tūhono ana i ngā whānau, i ngā hapori, i a Aotearoa hoki mā roto i ngā mahi toi auaha a ngā kaihaka.  

He hui whakatinana tēnei i te auahatanga, te manawaroa, me ngā pūmanawa nui o te ao Māori.  Ko te papa e pūtaata mai ai te rangatiratanga o te ao Māori, e kotahi ai te iwi ki te whakaatu i te ātaahua o tō tātou ahurea ki te ao. 

Tukuna te reo kia rere, tukuna ngā toi Māori kia rere ki te ao - kia toitū, kia ora!".

E ai ki a Nevak Rogers te Upoko Huapāho o Te Reo Tātaki, “Nō mātou te whiwhi kia whakapāhotia e mātou Te Matatini  ki te marea i te tau. I whakaatuhia te rerehua o ngā mahi kapa haka, i te reo Māori, i te ahurea hei whakamīharotanga mā te katoa. I eke te maha o ngā kaimātakitaki i tā mātou pāhotanga ki taumata kē noa atu.  Nō konei hoki taku koa kei te tipu haere tonu ngā mahi ā-rēhia, me te aha, hei te marama e tū mai nei, ka eke noa atu hoki te maha o ngā kapa haka ka tū i te papa whakatū waewae ki tētahi atu taumata; mai i Aotearoa nei, ā, tae noa ki Te Pāpaka-a-Maui.  

“Koni atu i te 50 tau tā Whakaata Māori me tā Te Reo Tātaki whai pānga ki te Te Matatini.  Mā te mahi tahi me te tautoko mai a Te Māngai Pāho ka pai ake  te whāngai i te hunga mātakitaki kei ngā taumata rerekē o te matatau ki te reo  – mai i te hunga ngākaunui  ki te kapa haka tae atu ki te hunga kātahi anō ka whai wāhi mai.“ 

He mea tautoko te pāho i Te Matatini o te Kāhui Maunga 2025 e Te Māngai Pāho.

‍